Taktu þátt í skemmtilegri hreyfiáskorun og hreyfðu þig í að minnsta kosti 30 mínútur daglega í 30 daga. Öll hreyfing telur!
Náðu í dagatalið hér, prentaðu það út og hafðu það þar sem þú sérð það daglega. Þú getur byrjað hvenær sem er og skráir inn á dagatalið hreyfingu hvers dags næstu 30 daga.
Ekki hika, taktu þátt og hvettu alla fjölskylduna, vini, vinnu- eða skólafélaga til þess að vera með. Það hefur enginn séð eftir því að hreyfa sig.
Ef við vinnum í átta klukkustundir á dag og sofum í aðrar átta þá eigum við ennþá átta klukkustundir afgangs til þess að sinna öðrum verkefnum eins og fjölskyldu, heimili, áhugamálum, hreyfingu og fleira. Við ættum því öll að geta fundið 30 mínútur daglega til þess að hreyfa okkur ef við forgangsröðum.
Ef þér finnst erfitt að finna tíma fyrir hreyfingu þá hvet ég þig til þess að lesa pistilinn Tími er takmörkuð auðlind.
Alþjóðaheilbrigðisstofnunin (WHO) ráðleggur öllum fullorðnum að hreyfa sig í að minnsta kosti 30 mínutur daglega því margar vísindarannsóknir hafa sýnt fram á að regluleg hreyfing hefur jákvæð áhrif á bæði líkamlega og andlega heilsu. Þeir sem hreyfa sig reglulega minnka meðal annars líkurnar á ýmsum sjúkdómum eins og kransæðasjúkdómum, heilablóðfalli, sykursýki 2, stoðkerfisvandamál, geðröskun og margt fleira. Reglubundin hreyfing eykur einnig líkurnar á langlífi og eykur lífsgæði. Ég hvet alla til þess að kynna sér nánari ráðleggingar um hreyfingu frá Embætti landlæknis.